- This topic has 7 replies, 1 voice, and was last updated 05/11/20237:40 pm by
.
-
Posts
-
-
Hi 光復香港廣場SL，
你好！
公投當然好，可以試下水溫。
但，你的問題一樣好多，你要逐一解答、澄清。
1. 點解「公投」風險相對低好多？
2. 點樣「慢慢吸引有志者出來投票及參選」？慢慢即係幾耐？你意思係唔止一次公投？
3. 你提議嘅公投係投乜嘢？上面你話公投風險低，但又話公投想「香港獨立」。嘩，咁宏大嘅目標竟然係低風險？
你的補充第4點，一嘢將所有「民主派」嘅人打沉晒、講到斗零都唔值，係咪要搞分化？又係「你不代表我，我不代表你」？我哋仲有本錢搞分化嗎？
其實你指出咗一樣嘢，就係推廣方面出問題。例如第一次民調 (Polls No. 1&2)，你知道有幾多人參與嗎？答案係 484！咁，你估「公投」會有幾多人參加呢？
-
Hi John，
你好！
謝謝你的問題。
1. 點解「公投」風險相對低好多？
投票人方面：
1）袁弓夷已經研究咗安全又唔重複投票嘅選民資格核實方法。
2）而且，事關公投係直接聯繫到香港人嘅利益，直接了當，大部分人都能夠理解從而做出一個代表自己嘅投票決定。相信投票人嘅數目係一定會多，甚或有可能多過選舉議員。
3）法不治眾。人數夠多，香港人夠團結，就會相對安全。候選人方面：應該利用公投引起西方國家注意，希望佢哋關注並且支持，同時警告中共唔好干預。其實係想西方國家做我哋保護傘！如果主要大國都支持，中共會唔敢亂來，第時出嚟參選嘅候選人會比較安全！從而避免好似47案咁樣畀人一網打盡，一次過拉曬。
2. 點樣「慢慢吸引有志者出來投票及參選」？慢慢即係幾耐？你意思係唔止一次公投？
成件事有咗個方向同埋議題，自然會有相同意向嘅人士吸引埋嚟投票同參選，共同去成就件事。2013年佔中都係由2013年頭慢慢醞釀到2014年928開始，香港議會都係由舊年7月27號記者會開始到而家一路發展落去。公投係可以好多次，至於完成咗第一次公投，就可以交畀第一屆議員去決定之後嘅公投議題，例如公投憲法通過等等。
3. 你提議嘅公投係投乜嘢？上面你話公投風險低，但又話公投想「香港獨立」。嘩，咁宏大嘅目標竟然係低風險？
九七年英國完成咗對香港嘅管治之後,香港身為殖民國係必須有一個公投，去俾所有香港人去表達自己對於香港未來嘅意向（例如歸中共/歸民國政府/歸英/歸美/獨立等），當時中英談判因為中共修改條例同時冇人肯詢問香港人意見，然後我哋就「被代表移交」中共。簡單啲嚟講香港人係被賣咗豬仔。我哋只係爭取返我哋被偷走咗嘅嘢。「公投」唔係等於「港獨」，「香港獨立」只係公投嘅其中一個選項，你要搞清楚先。外國(就算喺小區)都有好多公投，佢哋通常都係由民調開始問下啲民眾想唔想有一次咁樣嘅公投。係好正常亦都好平常嘅事。
「你的補充第4點，一嘢將所有「民主派」嘅人打沉晒、講到斗零都唔值，係咪要搞分化？又係「你不代表我，我不代表你」？我哋仲有本錢搞分化嗎？」
冇方向，其實就等如84年以來將個香港交俾一啲例如司徒華嘅共產黨員、一路扮為香港爭取民主嘅民主阿伯民主阿婆、入中聯辦嘅泛民等等去搞，佢地可以喺枱底下邊做晒啲出賣香港嘅嘢，香港人都唔知，亦都冇一個標準去監管，咪搞到今日一鑊泡囉。
公投亦都唔代表分化，只係根據大部分人直接投票嘅意向，定立一個制度，唔係再旨意人哋代表自己去決定第時應該點樣。假設公投出嚟嘅大部分人想香係「歸英」，就算選到出嚟嘅議員係共產黨員都好，佢做嘅嘢係幫到香港歸英嘅咁咪ok囉。反之如果喺當選議員期間，有人再入中聯辦，咁就睇得好清楚，下一屆就唔需要再選呢班人。又例如好似英國脫鈎咁樣，唔支持英國脫鈎嘅議員都一樣可以喺個議會嗰度做嘢。公投係藉著大部分人嘅意志去清晰選舉議員嘅路向，統一選出嚟嘅議員做事嘅目標，避免選咗啲議員出嚟入咗個議會自己做自己嘢。呢個唔關構唔構成分化事。
「其實你指出咗一樣嘢，就係推廣方面出問題。例如第一次民調 (Polls No. 1&2)，你知道有幾多人參與嗎？答案係 484！咁，你估「公投」會有幾多人參加呢？」
推廣方面係一個問題，由於公投係屬於每一個香港人既切身利益關係，相信關心香港未來路向嘅人都會有興趣參與，例如你都有興趣同我討論「公投」呢個題目一樣！而且只要議題清晰簡單就容易作出投票決定。第一次民調嘅內容並唔係公投嘅議題，所以不能作出比較。相信呢一個「香港未來路向」公投既會吸引較多人關注，投票人數亦會夠多。所以我建議籌委會作出一次民調，先問一問「如果有一個咁嘅公投，你會唔會投票？」來問下投票人意向先。
-
-
政治有人可能會當利益交易，我2016年親自寫信俾所有72位立法會議員，用A4公文袋入好晒請立法會保安幫我派發，包括泛民建制，梁游都有份，內容關於我個女K1已經怕左返學而見到既香港教育問題，我心諗應該冇人會唔關心小朋友！咁我真係太天真，真係人微言輕，我連一個回覆都收唔到，連講聲收唔收到信都冇！所以我後來先聯同一班家長成立「家長聯盟」！有人提泛民柒事係好事，等後人唔好犯同樣嘅錯！有心人必定有錯必改，而唔係唔俾人講！我當然同情而家泛民遭遇，我支持立既釋放香港所有政治犯！呢個世界真係人微言輕，所以我哋要團結所有香港人，HKP正好係一個恰當嘅組織！
至於當選議員，我哋一定要有個罷免機制請走唔恰當嘅人，例如要佢哋宣誓，如出現不當言行可以罷免佢地！唔好俾中共搵人扮黃滲入來！果D人見一個踢一個走！
-
Lhamo wong 謝謝你支持香港議會
-
-
Hi 光復香港廣場SL，
你好！
其實唔係我有問題，只係想你搞清楚點解要搞公投。
我再睇番你第一個留言提出嘅公投，就係「公投詢問香港人對香港回歸嘅意見」。
我覺得這個公投議題已過時。點解唔向前看，直接問「你支持香港議會嗎」？
你話「公投…係根據大部分人直接投票嘅意向，定立一個制度」。「制度」才是重點。
議會「制度」就係要明文規定未來香港議會規則、規條、守則（Rules and Regulations)。
如果你唔想好似你講嘅「司徒華、民主阿伯阿婆…可以喺枱底做晒啲出賣香港嘅嘢」，有咗議會「規則」，將來，如發覺有「議員出賣香港人」的行為，就可以踢出局！
-
借問搞這個公投之後有乜嘢行動？例如英國脫歐公投，成功後由英國政府執行脫離歐洲議會，香港議會暫時只係一個民間議會，在取得公投結果後沒有一個政府去執行公投後的決議，如果公投後冇行動，其實就等如係一個民意調查，這一個議題其實適宜早一點做民調，比有興趣參選的人作為參考，任何一個高支持度的方案，定必吸引到這個光譜的人報名參選，到議會成立一段時期運作成熟之後，在成立政府時再作公投，這個程序比較合適。
-
-
